Vlora, qyteti i dhjetra monumenteve dhe kalave më i preferuari nga turistët

Viti që lamë pas shënoi një rekord historik sa i takon turizmit në vendin tonë. Sipas INSTAT, Shqipërinë e vizituan në 2023-shin, 10,1 milion turistë, rreth 34.6% më shumë se një vit më parë. Në të njëjtat ritme ka nisur edhe 2024. Që në muajt e parë të këtij viti shifrat dëshmuan për një interes gjithnjë e në rritje me vizitorë kryesisht nga rajoni i Evropës, por nuk kanë munguar edhe turistë nga Amerika dhe Azia. Në ndryshim nga vite më parë, kur boomi turistik regjistrohej kryesisht në muajt e verës, vitet e fundit, Shqipëria ka hyrë në listën e destinacioneve me turizëm në çdo stinë të vitit. Përveç natyrës mbresëlënëse, turistët po tërhiqen gjithnjë e më shumë prej historisë, kulturës dhe traditës që nga epoka e antikitetit e deri në ditët e sotme. Gjatë vitit 2023, 28 institucionet historike e kulturore në vend përfshirë këtu muzetë, kalatë dhe parqet arkeologjike u vizituan nga më shumë se 1 milion turistë vendas e të huaj, dukë shënuar kështu një tjetër rekord që dëshmon se Shqipëria është e bekuar jo vetëm me një natyrë të bukur, por edhe me një kulturë të pasur dhe histori që po ngjall gjithnjë e më shumë interes.

Në rastin konkret mjafton të përmendim Vlorën, qytetin mes dy deteve, të cilin shumëkush e lidh me plazhet e bukura, por në fakt Vlora dhe e gjithë zona përreth ofrojnë shumë më tepër se kaq. Qyteti ku u martua Skënderbeu, ku u shpall Pavarësia e Shqipërisë, arenë e luftrave për liri dhe qëndresës shqiptare, Vlora zë një vend të merituar në historinë e Shqipërisë. Dhe kjo histori ka bërë që përveç plazheve, turistët të ndalen edhe në muzetë, kalatë, apo sitet historike e kulturore të zonës.

Në qytetin e Vlorës dhe në zonat përreth gjenden mbi 5 kala e kështjella, të gjitha unike dhe secila me vlera të jashtëzakonshme. Gjithashtu qyteti ofron me dhjetra monumente kulturore, kisha e manastire, xhami e teqe, laguna e shumë objekte të trashëgimisë kulturore që kanë tërhequr gjithmonë vëmendjen, duke rregjistruar vit pas viti një numër gjithnjë e më të lartë të turistëve si vendas ashtu edhe të huaj.

Kisha e Marmiroit është ndoshta një prej objekteve më të veçanta të kultit. Kjo kishë është e ndërtuar me gurë të papunuar të marrë nga shtrati i përroit aty pranë. Ndërsa për portat dhe fasadat janë përdorur gurë të punuar nga rrënojat e Orikut antik një tjetër monument i trashëgimisë kulturore në qarkun e Vlorës i themeluar që në shekullin e VI p.e.s. Qyteti është përmendur për rëndësinë e tij në betejat midis Maqedonisë dhe Romës në fund të shekullit të III p.e.s si dhe në luftën civile midis Cezarit dhe Pompeut në vitin 48 p.e.s. Sot këto dy objekte të rëndësishme numërojnë mijëra turistë vendas e të huaj.

Gjithashtu Muzeu i Pavarësisë një prej objekteve më të rëndësishme në qendër të qytetit të Vlorës ka regjistruar 40% më shumë vizitorë gjatë vitit 2023 krahasuar me një vit më parë, kryesisht nga Maqedonia e Veriut dhe Kosova, por nuk kanë munguar edhe vizitorë nga Italia e Greqia. Godina ku u mblodh qeveria e parë e shtetit shqiptar ekspozon dokumente dhe informata të rëndësishme të periudhës së Rilindjes dhe Pavarësisë dhe që prej vitit 1936, kohë në të cilën është krijuar e deri më sot, është plotësuar dhe konsoliduar si një nga objektet më të rëndësishme muzeale të qytetit të Vlorës dhe më gjerë. Më shumë se gjysma e turistëve që kanë vizituar qytetin bregdetar një vit më parë, janë ndalur edhe në këtë Muze që qëndron si simbol i qytetit dhe që bart vlera të rëndësishme historike.

Përveç Muzeut, një numër i lartë turistësh kanë vizituar gjithashtu Kalanë e Kaninës, Kalanë e Porto Palermos, atë të Treportit si dhe shumë manastire, kisha, xhami e teqe, banesa, institucione dhe rrugica që flasin jo vetëm me pamjen e bukur, por edhe me historinë dhe kulturën që bartin.

Duke parë interesin gjithnjë e në rritje të vizitorëve veçanërisht për këtë qytet, vitet e fundit është investuar vazhdimisht si në përmirësimin e infrastrukturës ashtu edhe në realizimin e projekteve që synojnë zhvillimin e ekonomisë dhe orientimin drejt një turizmi elitar. Një prej tyre është edhe Vlora Marina, një zhvillim urban miks që po merr jetë në qendër të qytetit të Vlorës, fare pranë Monumentit të Pavarësisë. Përveçse një rezidencë buzë detit, Vlora Marina ofron për këdo që vendos të investojë shumë më tepër se kaq. Pranë natyrës frymëzuese, kulturës dhe historisë, këtu mund të zbuloni përditë vlera të reja.